اولا اعزائي القراء كل عام وانتم بخير اصدقائي وقرائي بمناسبة شهر رمضان كل سنة وانتوا طيبين يا عيال احم احم ااقصد يا بشمهندسين
كل سنة وانتوا طيبين وربنا يجعل رمضان بدايه سنة سعيده لينا كلنا يا رب ومحدش يجرب الضاد اللي البشمهندز تشوس قال عليه ف البوست اللي فات
وبمناسبة الضاد هو ده محور البوست الضاد
الضاد ده حرف من حروف الابجديه بس حرف قاااسي قاااسي يعني
سببه ان انا كنت بلعب ع التعادل فخسرت وطول عمري بلعب ع الفوز يعني ف ثانوي كنت عايزه اطلع من الاوائل ع الجمهورية مطلعتش بس طلعت من الاوائل ع المدرسه يبقى الواحد لما بيحط حاجه ف دماغه يا بياخدها يا بياخد ااقل منها بسنة صغيرة
وده يودينا للاهلي ونقوله مبروك يا رافع راسنا والحمدلله الاهلي بدأ يرجع لمستواه بعد الماتشات اللي تحرق الدم اللي فاتت والاهلي اهلي طول عمره و فوق الجميع دائما وربنا يخليلنا ابوتريكة ويخلي للزمالكوية شيكابالا هيهيهيهييه
ام هند ايه التعادل والخسارة والبتاع والحجات الغريبة ديه ؟؟
اصل احنا ف ماتش كبير مدته خمس سنين احنا فرقه والكلية فرقه وبنلعب ماتش جامد متاح فيه كل الاساليب وفيه حكام طبعا وفيه كل حاجه والاجوان هي النتيجه طبعا والحمدلله كسبنا السنة الاولى بعد عذاب كبير جدا جدا
وبعد ما الكلية دخلت فيا انا شخصياا اجوان كتيرة زي امتحانات الميد تيرم ونتيجتها البمبى وقطعت الشبكة بتاعتي اكتر من مره كان اكبر جون دخلته فيا الكلية الضاد بس الحمدلله انا صلحت الشبكة وهخليها اكتر متانة السنة دي والحمدلله كسبت الكلية بس بفارق اجوان قليل مش مشكلة
المهم ان انا هلعب ع الفوز السنين اللي جايه ديه ان شاء الله ومش هفكر ف تعادل ابدا ابدا وكمان عايزه افوز بفرق اجوان كتيرة اوي ولازم مخليش الكلية تجيب فيا اجوان خاالص واحافظ ع شباكي نظيفة زي عصام الحضري واهاجم زي ابو تريكة وادافع زي وائل جمعة واتكتك زي جوزية وهبعد عن اسلوب الزملكاوية ده خالص
ولازم كلنا نلعب ع الفوز ونبعد عن التعادل وربنا ما يورينا خساره خااالص
وما الكلية الا ماتش كبير لا يجب خسارته ف اي من اشواطه لكي ناخذ الدوري وكاس مصر –ممكن الماجستير والدكتوراه وشغل كويس وكده يعني -
كفايه كلام ف الكورة بقى
كل سنة وانتوا طيبين وربنا يكرمنا كلنا وينولنا اللي ف بالنا وتبقى سنة سعيده علينا كلنا يا رب
