من الجاني؟؟

مش كل شوية حد يلعب ف البلوج ده حرااااااااااااااااااااااااااااااااااااام

البلوج اتقلب يا جماعه الرحمة حنا عايزينه بسيط ومن غير دوشة كتيييييير

احنا كول احنا رخمين مش باردين

مين غير التمبليت الحركات ديه مش كويسة لازم نقول لبعض الاول بس مش نغير التمبليت كده وخلاص مع نفسك يعني والاولاني كنا متفقين عليه كده عيييب
نستوني كنت هكتب ف ايه اصل انا دخلت ع البلوج قولت ايه ده هو ده مش هو ولا ايه لا بس العنوان مظبوط يمكن التاكسي نزلني هنا غلط بصيت لقيت الاعلانات الارنب ابو طاقية ورسمه الابداع وصورة النادي الاهلي وصرة سكان مملكة الغلس اه هما بس يمكن حد اعجب بيهم وحاطهم ف بلوجه
المحلات ااقصد البوستات هي هي اكيد محدش حطهم عنده بقى
قولت يبقى هو الشارع يووه يعني البلوج هوهو بس اتغير الشكل الخارجي
الحاجة بدل ما هي ع الشمال بقت ع اليمين ايه اللخبطة ديه ايوه نفس اللون بس انا ارفض واعارض ولازم نعمل اجتماع علشان نحل الموشكلة ديه ونحصر عدد المشتبه بهم او بقى اللي عمل العمله ديه يعترف علطول ولازم ناخد حكم صارم يعني نعمله اي حاجة ومش هنلاقي حاجة نعملهاله علشان هو صحبنا فنعفوا عنه ومش هنعمله حاجة بس هنخليه يعزمنا ع لبان وخلاص مش ازمة يعني وهغير التمبليت تاني بقى هي لعبة ومش عارفة مين اللي بدأها
لا بس انا متغاظة ان التمبليت اتغير وانا بقى مش كاتبة البوست اللي انا عايزة اكتبه النهاردة كنت هكتب عن دريم بارك بس بوست مختلف عن بتاع حنفي انتوا عارفين طريقة السرد تختلف طبعا طبعا وان البنات رغاية اكتر بس طريقتنااحنا الاتنين زي الفل –لحسن اتقتل ولا حاجة – بس انا لازم احكي انا كمان بس انا بقى مش هكتب ولازم اشوف مين اللي غير التمبليت ده وهقلبها لقضية رأي بلوجي عام واشوف ايه رد فعل الجمهور ع اساس ان الزوار كتير يعني مش مشكلة المهم يعني ان الموضوع ده مش هيتسكت عنه واحب انووه ان القضية هتتقفل لما نعرف المتهم
و بشوية تفكير بسيط قدرت احصر المشتبه بهم مين
طبعا تويتي لا علشان مش عارفة الباس ورد بتاع هندزة فمش هتعمل الموضوع ده وممكن تكون اتجننت وعملته ده بنسبة 0.5 %
واشك انها تكون مستكة ده لانها اختارت معايا الاولاني وكانت هتقولي لو غيرته بس ممكن تكون هي بنسبة 13 %
وممكن تشوس بس برضه اشك ف الموضوع ده علشان كان عجبه التمبليت الاولاني بس احتمال بنسبة 66% انه يكون الجاني وده اكبر احتمال
اما روشا ممكن بنسبة 20% انها تكون هي بس مش معقول من اول ما تخش وتعمل اكتفيشن ف البلوج تروح مغيره التمبليت كده علطول
واكيد يعني مش انا وممكن احتمال 0.5% انه يكون عفريتي ولا حاجة ولو ان ده احتمال ضعييف اووي
يبقى كده اكبر احتمال عندنا تشوس وااقل احتمال انه يكون عفريتي اصلا ده احتمال معدم بس قولت ادخل نفسي ف دائرة الاتهام

ولو محدش قال مين اللي عمل كده انا هتصل بكونان يجي يحقق ف الموضوع ده
اللهم بلغت اللهم فاشهد