سكوني يسعدني - بالعند فيكوا - 0

مش عارفه انتوا ليه مدايقين اوي كده ان انا ساكته اغلب الوقت وكل مره بتحسسوني ان ده اكتشاف جديد اني مش بتكلم زيكوا بس عموما ولا يهمكوا وانا كمان مش هيهمني لان فعلا سكوني يسعدني

اولا الصمت ده طبييعه فيه من زمان واني كلامي قليل يعني مولوده كده ومهياش عاده مكتسبه بس فعلا ف الفتره الاخيره زادت شويتين وده ليه اسباب ترجع لحالتي النفسيه وحجات تانيه
المهم عشان متزعلوش ممكن اقولكم على شوية اسباب

ف الفتره اللي بدأ فيها عقلي فالنضوج - كبيرة شوية دي – لافعلا لما ابتديت افكر بشكل مختلف عن التفكير الطفولي ملقتش حد من اللي حوليا بيشاركني نفس طريقة التفكير مع احترامي ليكوا كلكوا بس فعلا انا كنت ولازلت بحس بغربه او بمعنى اصح بحس اني غريبه عن ابناء جيلي مع احترامي الشديد ليكوا كلكوا كمان مره
يمكن تكون دي مشكلتي انا ومحدش له دخل فيها بس برده انا كمان مش قادره احلها
وطبعا بيترتب على المشكله دي نوع من انواع الفتور والملل من المجتمع المحيط بيه ف بلاقي اني لو كلمت نفسي يكون اسهل اكيد هي هتفهمني اكتر

اما عن سبب اخر فهو اني كنت بسكت بسكت واجي اتنيل فجأه واتكلم ولما اتكلم ارجع اندم على كل كلمة قلتها والوم نفسي واقول كان ايه اللي خلاني اتكلمت مكنت ساكته كان ايه اللي حصل 0000

ممكن كمان سبب اخير وهو ان في حكمه بتقول " من كثر كلامه كثرت خطاياه "
و حكمة تانيه كمان بتقول " من ترك فضول الكلام منح -بضم الميم-فضول الهيبه" وطبعا فضول يعني زياده

وهذا كان كل مالدينا من معلومات ونشكركم على حسن قرأتكم للبوست